Maa ki saariya
Maa, tumhe saariyaan bahut pasand hain, hai na? Shayad kabhi tum saariyon ko pasand karti ho, aur kabhi saariyaan hi tumhari tareef mein lehrati hain chupke se, pyaar se. Mujhe ab bhi yaad hai, ek baar tumne mere janmadin par ek saari pehni thi. Uska rang yaad nahi, par tumhara chehra yaad hai khilkhilata hua. Tum kitni khush thi us din, jaise saari bhi tumhari muskaan mein rang gayi ho.
Kabhi tumhari naram si saari par dhoop mein god rakh ke soya karta tha. Tumhare haathon ki thandak aur saari ki khushboo dono milke mujhe ek alag si rahat deti thi. Jab bhi tum aarti karke aati, saari ke pallu mein aarti baandh laati. Ghanti jab mere sir ke paas bajti, lagta jaise mandir ghar ke andar hi bas gaya ho.
Mujhe yaad hai ek samay jab tumhare paas utni saariyaan nahi thi jitni tum chahti thi. Shayad ghar ki chhoti-badi zaruratein pehle thi. Tum kehti thi ki ek chhoti si jagah mein 100 se zyada saariyaan aa sakti hain aur dheere-dheere woh kona bhar gaya. Par ek baat ajab thi tum jab koi bhi saari pehenti, lagta woh tumhare liye hi bani ho.
Laal saari, jisme zaree ke kaam mein jaise suraj dhalta ho. Neeli Kanjeevaram, jisme har leher mein ek kahani ho, aur tum jab chalti ho to woh saari bhi tumhare saath chalti hai garv se. Haldi ke rang ki Chanderi saari, jisme tumhari muskaan aur bhi roshan lagti hai.
Ek patli cotton ki safed saari bhi yaad hai, jisme tum sabse zyada shaant lagti ho. Jaise koi thandi hawa ho, jo sirf ghar ke liye chalti ho. Phir ek hai tumhari wo gulabi leheriya, jo tum har raksha bandhan pe nikaalti ho jaise tyohar ussi ke intezaar mein ho. Aur ek kali saari hai silk ki jise tum sirf shaam mein pehenti ho, jahan tumhari bindii, tumhare baal, sab kuch uske saath milke ek kahani ban jaate hain.
Unhi saariyon mein, maa, aap har subah 8 baje college jaaya karti thi safed cotton, ya kabhi halki peeli, jisme chhoti jhumkiyan hilti thi jab aap tez kadam chaltin. Mujhe aaj afsos hota hai ki maine kabhi us waqt aapki mehnat ko utna nahi samjha, jitna samajhna chahiye tha.
Har din, woh saariyaan sirf aapki khoobsurti nahi, balki aapki mazbooti ka bhi rang ban jaati thi. Jitna wo saariyan chamakti thi, utna hi aapka jazba bhi. Wo palle mein kitaabein hoti, haathon mein chai ka cup, aur chehre par ek shaant
Shayad main kabhi kisi aur ko aap jaisa itna majboot na dekh paun
Aur aaj bhi, jab almari mein woh saariyaan latakti hain, mujhe aapki ek ek subah yaad aati hai. Aapki har jhalak, har kadam, un saariyon mein kahin na kahin ab bhi lehrata hai.
Jaise rang bhi tumse seekh gaye ho jeena. Tumhari muskaan, tumhara andaaz, tumhari baatein sab kuch un saariyon mein kahin na kahin utar jaata hai. Saariyaan tumhe pasand hain maa, par lagta hai unhe bhi tum bahut pasand ho
S.J.
damn, i had been missing my mum all day and this just made it worse haha. but honestly, very beautiful read!
This was deeply beautiful!!
You really have the great ability to make your writings so picturesque. I could feel everything. This was so good Shaan, really. The level of observation and the way you put it is fantastic. It's perfect this way too, but just in case if you'd like to convert the text in Hindi too, it would be feel even better.
The essence of it is soo good. I just felt if the text would be in hindi, it would flow even better. I also write in hinglish only whenver I have to write something in Hindi, but then I convert it in hindi text through ChatGPT, or type from phone.. tbh typing in hindi is very difficult for me XD.
But regardless, this was fantastic. Keep up the good work. Just loved it.