Snehlata - Conversations by a flower

wohi tere komal haath

wohi nathkat si muskaan thehri

jismein mamta basi hai, aur thoda sa bachpan bhi

Jin haathon ne chhuye kabhi sitar ke taar

aur kabhi kitaabon mein poora sansaar

phir baba ka pasandida nariyal ka tel

aur kabhi kiroshiya kiya hua rumaal

tu aksar kuch phool upar se toda karti hai

jahan tak tere komal haath pahunch paate

kuch neeche se bhi toda leti

kyunki tujhe woh chhupe hue phool bhi dikh jaate

kuch phool tu chhod bhi deti, kehkar

“tumhe bhi toh phool pasand hai”

teri usi muskaan par hum turant khil jaate

hamaari lata prati tera sneh

tere wohi buddhe se bargad ko bhi aksar bhaya karta hai

Hum apne aap ko kabhi dekh hi nahi paaye

par tu humein hamesha batati hai

ki hum kaise dikhte hai

kaise kinare par thode se gulaabi laal hain

toh beechon beech mein thode peele bhi

hamari khushboo kaise tujhe apni ore kheench leti

aur kaise hamare upar bhinbhinaati madhumakkhi

tujhe dara bhi deti

main jaanti hoon, gamle mein dhal jaana kya hota hai

shaayad tu bhi kisi apne gamle mein dheere dheere dhal gayi hai

shaayad hum dono ko yeh mitti bahane lagi hai,

ya dhasne… ab pata nahi…

ab yaad bhi nahi..

main is gamle ke bina shaayad murjhha jaun

lekin tune is gamle ke saath sambhalna seekh liya

Main aaj tak nahi samajh paayi

ki aasman bhi gamlon mein samaa sakte hain

Kash tujhe bhi koi milta

jo tujhe unhi aankhon se dekhta

jinse tu humein dekhti hai

jo tere aasman ko aur bada aasman de sake

Snehlata…

Pictures of my grandmother (snehlata) ‘s flowers taken by her